Menu Tutup

Sejarah Topadatindo

Kisah sejarah persatuan para pemimpin to lepongan bulan (sebutan Toraja masa itu) yang disebut sebagai Topadatindo tomisa’pangimpi yang dituliskan dalam bahasa tinggi Toraja. ……

Ia ade’ tonnanu sali papan ia tau lan lili’na Lepongan Bulan, marante banua ia lan tikunna Matari’ Allo. Tang sipakundunan ia bukunna loli, tang sipakalabamban ia tengko pamuso’.

Apa ma’lalong-lalong ia Pakila’ Allo lanmai Randan Batu, ma’pangggalo’-galo’ ia Ambe’na Bu’tu Bulaan lanmai Batukarambau. Lurekke lusau’mi untengko lullu’ aluk dipatuo balo’ lan lili’na Lepongan Bulan, lulako lulanmai ussenggong balatana sangka’ dipatumbukumuku’ lan Gontingan Matari’ Allo.

Unggontingmi batang dikalena to tang ditulak mata buntunna, ungentemi tondon to batangna to tang dibalado tondon tanetena lan tikunna Matari’ Allo. Unggaragami liku illan padang di Bokko, ungkondomi limbong ilan ulunna padang di Sangalla’. Nasakka’imi buaya, la nanii umpasombo bunganna katongananna lan lili’na Lepongan Bulan, ia nanii umpapayan peampunna kakuasanna lan tikunna Matari’ Allo.

Ma’kada deatami Pakila’ Allo, sumu Puangmi Ambe’na Bu’tu Bulaan, nakua : “Iatu la mendadi kande mammi’na te buaya kasayanganku, iatu la mendadi timbu’ marassanna te bendo’ kamoyaku, tangia olo’-olo’ lan kapadanganna, tangia manuk-manuk di langi’, tangia olo’-olo’ bu’tu ri uai, sangngadinna iatu pia’-pia’ bunga’ urrubak pa’tambukanna indo’na, anak pa’bunga’ tungka sanganna.

Rumondo madinginmi lan Lili’na Lepongan Bulan, ma’pu’ mapallanganmi lan tikunna Matari’ Allo. Ditoeanmi tengko situru’, la ungka’tu angin dipudukna Pakila’ Allo, dikankananmi batakan siolanna na unronta’ tondon to batangna Ambe’na Bu’tu Bulaan. Dipasananmi ipo rekke Baruppu’ la dipake la untina’ bamba koongan Pakila’ Allo, la untepok passaronganna Ambe’na Bu’tu Bulaan.

Allo siappa’na Pakila’ Allo nalandi’ makuyu langkan, kulla’ kasidollokan na Ambe’na Bu’tu Bulaan madete’ marammun manuk-manuk. Dikutu’imi kada tu anak daranna laungka’tu angin dipudukna Pakila’ Allo, dibokongimi pepasan polo kaindi’na la urronta’ bannang penaanna Ambe’na Bu’tu Bulaan. Maringnganmi batu ba’tangna anak daranna, telalang lolimi karanganpasiruanna polo kaindi’na anna patiangka’ bate lentekna lako bangunan banuanna Pakila’ Allo anna patirimbak passoeanna lako tadollo ata’na Ambe’na Bu’tu Bulaan.

Tonna rampomo ma’tumangi’-mangi’ tu anak daranna siindo’mi ma’biung-biung to polo kaindi’na. Naraka’mi tu Pakila’ Allo, nalukai kanukunna sidi’ tu batu kidena nasussui ipo. Ka’tumi angin dipudukna Pakila’ Allo, ronto’mi bannang penaanna Ambe’na Bu’tu Bulaan. Ka’tumi umpenallon sikunna ronta’mi umpennampa’ daun talinganna. Paya ta’nakmi tau lan Lili’na Lepongan bulan, ma’ganda patananmi lan tikunna Matari’ Allo.

Umpatiangka’mi bate lentekna Bu’tu Bulaan male ussedan sarongna langan-langan padang di Bone, umpatiri’bakmi passoeanna bungsu pepayunna male untoke’ dallo riona langngan to Sendana Bonga. Umpatiangka’mi bate lentekna Aru pute sola sambo boko’na dio padang di Bone. Umpatimbami passoeanna Ra’ria manda’ dio mai to Sendana Bonga sipanglola rinding tingayona. Susi tanete lumembang, pangala’ ma’palumingka umpalalan Bambapuang, unnola pinti deata, dibilang, disuka’-sukaranmi ganna’ pempitu palo-palo.

Tonna lambi’mo padang di Malua’, tonna se’ponmo tallu Batu Papan diborong tallumi Buntunna Bone, dipannola matampu’mi penduan palo-palo; dipannola matallo penduan palo-palo, dipannola tangnganami padang pentallun palo-palo. Ma’urang samussangmi Buntunna Bone tama Lepongan Bulan ma’bumbu’ sidoloanmi to Sendana Bonga tama Matari’ Allo. Rampomi ussanga’ lili’na Lepongan Bulan, tu’tunmi ussangka’ tikunna Matari’ Allo. Ma’lalong-lalongmi lan lili’na Lepongan Bulan, ma’panggalo’-galo’mi lan tikunna Matari’ Allo. Dilutu tombangmi bubun dirangkang, diossak balatanpanambu bulaan. Dite’ka mi bua layuk, dikala’pami kaluku lundara, diembe’mi induk saang bunga’.

Apa maluangan sambu’ ia batu ba’tengna Pong Songgoi Limbu, apa mabomba luanna ia karangan pasiruanna Ne’ Sanda Kada. Umpatuka’mi pa’inaan la untulak Buntunna Bone, umpasolo’mi pa’ba’tengan la ullangda’ to Sendana Bonga. Untananmi pasa’ bongi lan padang di Sarira, umpabendanmi tammuan dipamalillin lan di Pata’padang. Dilando lalanni Pong Kalua’ rekke Randan Batu, dilangka pa’taunanmi Karasiak langngan Madandan, anna Topa’pak lan di Mengkendek, Landoaak di Boto’ na Bataralangi’, Ambabunga’ lan di Makale.

Unnisung ma’kada situru’mi lan kombong kalua’ unno’ko’ misa’ bungannanmi lan tinimbu malambe’, anna bendan to pada tindo. Dipasanmi to dipalondongan  kada lanmai Lili’na Lepongan Bulan, ditambaimi to dipomanuk muanena pangumpuran pau-pau lanmai tikunna Matari’ Allo’

Pada rampomi  tama padang di Sarira, pada umpokadami tindo bonginna, pada ussalumi mamma’ karoenna. Misa’ tindo napotindo, misa’ mamma’ napomamma’. Ditantinnamo to pada tindo, digente’namo to sitinti pangimpi. La dipamarongkami kombong kalua’ illan padang di Sarira. La dipamamak mi tamimbu melambe’ illan Pata’padang.

Dilando lalannimi bainna Pong manapa’ lako Se’seng dilangka pa’taunanmi bonde’na datu muane di Ledo, disanga pokki’ diganti mendelo-delo. Diosokmi batu titanan tallu, dipatunannangmi terongko tiringku lalikan. Dipa’to’mi panampa to lambun dipatunannangmi pa’kombong lan to Padangiring. Dipandanmi langngan, dibato’ni karumpengan ao’. Disembangmi bane’ situang bombing sumomba matallo diti’paimi loko situang daun sumomba lu rekke. Napoballaran ampa’ pokki’ lan padang di Sarira, naporantean tuyu mendelo-delo lan Pata’padang.

Dipabendanmi Banggai lanmai Salu ussuru’ kanan kairinna pokki’, ussara’ka’ kanan kairinna pokki’, tuladanmi to dipodatu muane lan mai Garatuan ussara’ka’ tingayo boko’na mendelo-delo. Bendanmi Patabangbunga’ lan mai Tadongkon unnambu’ pasoanbangi’, tulangdanmi to dipodatumuane umparra pangulu mataki’, bendanmi Pong Songgoi Limbu ma’timpolak maa’, tulangda’mi Ne’ Sandakada ma’tetuk doti langi’. Bendanmi Tumbang Datu lan mai padang di Bokko unnindo’ kara kayu nangka’; bendanmi Ne’ Tikuali lan mai padang di Ba’tan unnindo’ kapuran pangngan, tulangda’mi to dipodatu muane unnambe pelambaran bolu.

Ditobokmi makairinna pokki’, disumbelimi tang mabekona mendelo-delo. Ditimbakmi pa’dunna pokki’ dadi batu, dikkilangmi paina’ kombong buku padang. Randukmi dipopentoen manda’ la untulak Buntunna Bone, tipamulami dipopentinanti matoto’ la ullangda’ to Sendana Bonga. Diindo’mi basse kasalle, diambe’mi panda dipamatua tana.

Kalebu tallangmi kombong kalua’ lan padang di Sarira, memun buloala’ mi tumimbu malambe’ illan Pata’padang kumua : misa’ kada dipotuo pantan kada dipomate. Rokkomi tang maratoi bombing, diongmi tang tu’pe daunna. “Apa denki’ manii ma’dua takin, denki’ manii massele patomali la untengkai kalo’i te basse kasalle, la ullenda pasala umai te panda dipamaroson, la umpamamma’ rokko lambananna Ambe’na Bu’tu Bulaan to tang napakanikuan”.

Randukmi dipabendan dama’ lan padang di Sesean dipatulangdanmi lan padang di Sado’ko, dipatunanangmi lan padang di Gasing; dipamillikmi mata to buta anna die’te lima to sekong.

Dirambumi bombonganmi Aru pute sola sambo boko’na, dipatu’pe daunnami Ra’ria manda’ sola rinding tingayona. Ka’tumi angin dipudukna Aru pute sola sambo boko’na, tepokmi passoronganna Ra’ria manda’ sola rinding tingayona.

Lu mokkonmi lalanna sesanna bala’kayan raa’ langan padang di Bone. Tontongmi sitanda cali masae lako si tanda musu. Apa kaluangan ia batu ba’tengna Kadere’ illan di Duri, apa massinggung ia pasiruan Amang lan di Rumendan. Umpokole kombami batang dikalena langan padang di Bone, umpobembang parayoanmi tondon di batangna tama Lepongan Bulan. Umpatuka’ pa’inaan la undasi’ pokana pindan, umpasolo’ pa’ba’tengan la umpasilasuk le’tona komba bulaan.

Umpatiangka’mi bate lentekna to dipalondongan kada lan mai padang di Bone umpatirimbak dukami passoeanna to dipomanuk muanena paumpuran pau-pau lan mai lili’na Lepongan Bulan, pada rampomi lan padang di Malua’. Diosokmi tu mimbu malambe’ illan padang di Rumendan.

Kalebu tallangmi kombong kalua’ la mamma’ rokko pindan tang damma, mamunbulala’ mi tumimbu malambe’ la tibambang rokko gori-gori tang beluakan. La sule sangkutu’ banne, la tibalik sangboke amboran. Dipamarongkami kombong kalua’ ilan padang di Bambapuang, dipemamakmi tumimbu malambe’ illan pintu deata. Ditananmi basse kasalle, disusukmi panda dipamaroson, ditanan dipematuo langi’, disusuk dipamatuo tana’, ditananmi rumpuan batu, diosokmi sendana lalong. Ditananmi basse kasalle, diosokmi panda dipamaroson, disanga : “Basse sanglentenan tallo’, panda sangsorongan pindan”.

Bendanmi Ne’ Tikuali lan mai Ba’tan unnindo’ basse kasalle, tulangdanmi to dipedatumuane unnambe’ panda dipamaroson. Laditanda tasikkimi pindan tang bamma’ Buntunna Bone anna Lepongan Bulan la ditoding minangaimi gori-gori tang beluakan to Sendana Bonga anna Matari’ Allo. Dirokmi sokko sangbali unnindo’ basse kasalle, ditokkonmi tarangga sangpiak unnambe’ panda dipamaroson, dikua :

“Ia na den untengkai kalo’ basse kasalle, ia naden ullenda pasala uma panda dipamaroson , la natemme’ tanduk sokko rokko la’tana padang la nasero tanduk turangga lako matallo matampu’. : Ditutungmi bangkaan pu’pu’ lan tangngana tondok ke den ullenda pasala uma panda dipamaroson. Dirodo susu baine dikua : “anna tang memmimmi’ ke den untengkai kalo’ basse kasalle, ke den ullenda pasala uma panda dipamaroson”.

Ditundanmi basse dipaturuan guntu’ dirujanganmi panda dipamaroson. Disusukmi buku rapona Pakila’ Allo, ditananmi bamban tang mabekona Ambe’na Bu’tu Bulaan.

Dikua : “Ia naden ussanak sulu basse kasalle, ia naden ussobu mata kalambanan panda dipamaroson laumpolalan lalanna Pakila’ Allo to pasisosurung lindo alukna, laumpamalamban lambananna Ambe’na Bu’tu Bulaan to tang mekasangka’ to tang mekapanikuan.

Dipopa’indo’mi basse kasalle langngan Bone, dipopa’ambe’mi panda dipamaroson tama Lepongan Bulan. Dilenten tallo’ langngan Bone tang tumba tiapa, disorong pindan tama Lepongan Bulan tang bamma’ beluakan. Tontongmi dianna batu silambi’ masae lako dodandan karangan siratuan.

Reference : Bibliography 020

Related post :   Ensiklopedia : Toraja

1 Comment

  1. Risal

    Kalo bisa, untuk cerita sejarahnya, ada yang bahasa Indonesia. Jadi yang kurang memahami bahasa toraja, bisa mengerti sejarah yang terjadi pada waktu itu. Terima kasih

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!