Menu Tutup

Londe Tananan Dapo’

Londe tananan dapo’ berisikan pesan-pesan moral bagi kehidupan berumah tangga. Garaganki’ lembang sura’ Lopi dimaya-maya Anta nai sola dua Umpamisa’ inaa

Manda’ko sitoe lima Silu’pi’ maya-maya Mituo melo Ammi lobo’ barana’

Andi’ siri’-sirisanni Andi’ banni mabeko Nang la kitamo Sipobayu malambe’

Susiki’ to tallang tepok Pada tae’ lolokna Dipasitammu Umpamisa’ inaya

Kadakera to inaya Ke ma’ranga’-ranga’i Tae’ susinna Kema’uyun didii

Manda’ko kita sangondo Sitoe ayoka Mitutu lalan Naria karapasan Inde pepasanna nene’ Pangnganna to dolota Basse situka’ Ilan tananan dapo’

Ke natorroiki’ rampa’ Lan tananan dapo’ Bo’bo’ sangraku’ Dikurrean sumanga’

Ikori kupomari’pi Kupotangmale-male Tosso mali’ku Ke diona’ la’pekmu

Pela’-pelaranna’ kada Keden tang palambi’ku Tempon bitti’ku Ditende’ kaboro’na’

Apara sa’pona ara’ Sengke ma’lana-lana Kada malamma’ Kada tae’ bukunna

Tiroko lutena bu’ku’ Tia’na koro’-koro’ Natokon beko Ke sumalong misa’ri

Maparri’ tu pantan torro Kesibala buntuki’ Angin mangngiri’ Dinai mekutana

Tang maraa ia balu Naboko’i balinta Kanunu-nunu Diong to’pengkaloan

Diongna’ liku mandalan Mukasinna-sinnai Ombo’na’ pole’ Mupessala-salai

La mualli raka kada Muma’loko-lokora Pa’danna’ dikka’ Tu tang dikamboroan

Ku sanga induk la kappa Mayang ma’loko-loko Rampona’ lako Anna kila’ memassak

Serre’ mariri matanna Lo’ pollo’ banua La ussarakki Manuk manda’ buyanna

Salli’ ba’ba sala’ torro Dibuni tetuk rinding Disasak nenne’ Dirembangan palongko’

Sangbanua pada kappa Pada tang sumu-sumu Kalena manna Nasanga ampu tondok

Mane suru’ mane baru’ Nama’tangngamo allo Mindamo ia La umpadukku api Tumbami indo’ totemo Ma’passan patomali Ia ma’nasu Ia undaka’ kande

Tumbari ambe’ totemo Nama’layo-layora Mukkun membati’ Mukkun salle sumalong

Nokana’ dibubun dua Saruran patomali Bubun misa’pi Saruran dipatungga’

Ba’tu latumbami dako’ Pia dadi totemo Salli’ ba’bamo Disua mantaranak

Kurin sitampa peleko’ Ilan tananan dapo’ Kenna merrupa To maluangan ba’teng

Maupa’mo ia tau Simatuttuk anakna Anakki kami Urrondonni banua

Ba’tu ma’pami tatto’ Ke tumanan dapo’mi Sumalong manna Nasule mepasandak

Ba’tu ma’pami lai Ke tumanan dapo’mi Kanuku manna Naarru’ tu’tu’ allo

Susikanni manuk biung Burinti tang keindo’ Ma’kissak-kissak Ke la lambunni allo

Maparri’ ma’dua ambe’ Ondong ma’tallu indo’ Torro ritangnga Dirimpi’ patomali

Ada’ meloi tu bati’ Tundan maya-mayai Da’anna sa’sak Untimbu’ palangona

Da’mu sule massambeko’ Ke sumalong-malongko Kayu sangbingnga’ Kukurrean sumanga’

To ma’dikka’ tu’tu’ allo Butung to la ru’du’mo Anna ponnopa Barra’ lan pasallona

Maparri’ massampe ao’ Lan toean aluk Dipotangrapa’ Diposibala rinding Reference : Bibliography 033

Related post :   Ungkapan-ungkapan Toraja #1

1 Comment

  1. Pingback:Londe, pantun tradisional Toraja | langkanmaega.com

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!