Menu Tutup

Londe Dakaran Kande

Londe dakaran kande atau pantun mengenai pencaharian nafkah yang berisi dorongan agar tekun dan ulet dalam bekerja.

Pada manarangki’ ia
Pada to pande-pande
Langi’ muteka’
Bakku’ kutetuk annan

Musangana’ tang mendau’
Ke natombangna’ litak
Tae’ ia tau
Mendau’ tu’tu’ allo

Andi’ mukatu’du-tu’du
Umpattuan salongmu
Suleko mai
Muma’baluk saru’bu’

Lale’ mannamo dirangngi
Petaa samosona
Lendu’ tu allo
Lendu’ rokkoan kollong

Da’mu ula’ to manangga’
To ma’dokko punala
Pissanko sassak
Pempitu tangkumande

Susina’ dikka’ paniki
Tassu’ menduruk bongi
Leppeng ia tau
Angku masara’-sara’

Tama’totemomo kita
Da’ta ma’masiangpa
Dikki’mo allo
Tapalendu’ punala

Nala membuara punti
Nala memmatasakra
Mukkun disondong
Tu daun mellolona

Kukalle-kallei aku
Tangupu’ kupomangnga
Balao ru’du’
Narimpi’ pare kutu’

Susi bangko dena’ topo
Dao pili’ tanete
Untayan kande
Kande bu’tu kalena

Sulemo’ ulliling tondok
Ulleko’ randan langi’
Tae’ ia tau
Kumande tang mengkarang

Ula’ko kapaissanan
Tundanko malutemu
Musisolanni
Tassu’ mandaka’ kande

Mukua duka ma’kada
Si’pi’mo pandakaran
Nala si’pi’ra
Ikori tang pakita

Apara la napabu’tu
Tu undangkanni langi’
Rokkoko mai
Anta mantanan bite’

Tae’ tau dadi senga’
Tibussan makalaen
Tu la sitangke
Kalembo’ la nasuak

Bale unnaang diliku
Undaka’ pendurukan
Tallanko sidi’
Da’ natolo’ko sumpi’

Reference : Bibliography 033

Related post :   Badong : Kadong Bating Pa'pakilala

1 Comment

  1. Pingback:Londe, pantun tradisional Toraja | langkanmaega.com

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!