Menu Tutup

Landorundun, maballo rupanna maega garaganna

Landorundun versi Riu by Yusuf Tampang

Tipamulanna’ tuna’, domai Dassi Deata tondok na deata…

Denmi misa’ baine unsangai kalena Lambe’ Susuq sibali muane disanga Salogang. Saelako ma’dadian bati’… undadian misa’ pia baine nasangai Landorundun.

Belanna iate anakna tonna dadi…iatu beluakna kalandong na rundunni tu mintu’ kalena sia napembungku’ tu beluakna….

Iate Landorundun tipamulanna dadi maballo rupanna sia susi deata paissanna… mintu’ kalena maserrong sia lindona susi to na arrang bulaan…

Iatonna simbolong manikmo te Landorundun tonna kasallemo, busarungngu’ baunna sia iatu beluakna tenna bangto sia tonnang ketamba kalandongna sae lako 777 da’pana, dadi ianna simbolongngi tu beluakna susimi pare dipatuku sia tae’ na silasa tama nase ke dipatamai…

Ianna male mendio’ te Landorundun sipira-pira solana male ungkayunanni tu beluakna lako turunan (bubun/sumur tempat mandi orang Toraja dahulu). Belanna maballo rupanna budami muane morai la unpoindo’ anakki.

Apa belanna iatu tomatuanna Landorundun to buda eananna buda muane tae’ nasarai rampo malaku (meminang atau melamar). Iate Landorundun den sarrakka’ ba’tu suruq bulawanna (sisir dari emas) napake suru’i beluakna.

Na iake mangka ade’na mendio’, mintu’ sangbara’na pia baine tama unsuru’i sia un una’i boka’ beluakna.

Denmi ade’na pissan attu na male mendio’ rokko turunan, na ba’tu pirari sangbainena male unturu’i. Iatonna mangka mendio’ nasuru’imi solana tu beluakna sia na una’i bokaq. Belanna sasa-sasa suru’i tu beluakna, ka’tumi ade’na sanglamba’ na lulunni tama sarakka’na/suruqna, tae’mi naupu’ suruq tubeluakna saelako uranmi sia siliu-liu bara’ sae, nakuami ade’ lako solana, kale tasulemo na dopa banua dako namane.

Iatonna sule lako banua, torromi sarakka’/suruq bulawanna dao to’batu nani ma’dokko. Sae lako banua namane daka’i tu suruqna na tae’mo.

Ia ade’ te suruqna Landorundun, nairi’ bara’ na tobang rokko to’ uai… male na bawa uai tarru’ unnola salu male rokko Malangngo’ sita’pa salu Sa’dan tarru’ male na bawa uai sae lako tasikna Bone.

Iatonna ta’de mo te suruqna Landorundun, mintu’ tau lan tondok disua nasang daka’i pa tae’bang tau ade’na untiroi.

Saelako to….

Tumangi’mi Landorundun na mekutana lako dassi (burung).

Nakua,

“Eee dassi… ta’de mo inde sarakka’… passussu’ bulawanku, iya manna ku rannuan untunduina’ unrundun beluakku… lama’pamo’i…”

Nakua mi dassi, “da’mo mu tumangi’ Landorundun, ki malemora unnula’ lolonganna sakke’, unrundun randanna salu un pasalongngi mata lako iti’ sarakka’ bulawan”

“Apa ianna alami tau, la kiapami…”

Nakua mi Landorundun, “ianna to baine, la siuluqna’…ianna muane, la sibalina’…”

Kappamo to tu Landorundun, na male mettia’ te dassi undaka’i tu suruqna unnula’ lolongna uai sia unrundun randanna salu sae lako tasikna Bone.

Den mi dipokada misa’ muane di sa’bu’ Bendurana anakna to kapua (puang) dio Bone, male mendio’ dio biring tasik sola kaunanna (budak/pesuruh).

Na tiromi tu suruqna Landorundun dukku-dukku lan tangnga tasik. Nasuami tu tonasolan male unnorongngi… apa mintu’ tu tonasua male unnalai, sule leko tae’ apa na bawa.

Ia ade’tu undinna nasua, mawatangna ade’ sia buda balo’na… apa tae’ ade’na nasule te tonasua saba’ mate lan tasik.

Male kalena mi ade’na Bendurana unnalai na ma’lingka tama tangnga tasik na alai tu sarakka’ bulawan nani beluakna Landorundun dio dilulun.

Na bungka’i lanmai suruq tu beluakna na suka’i. Mangka na suka’, mangngami nakua mi ma’kada,

“Deata umbamo ma’beluak te mangka unnala sunga’na taungku sia pa’baraninna Bone….”

Ia tonna attu… rampo dukamo dassi deata lako na tiroi tu Bendurana sitoe sarakka’ bulawanna Landorundun sia beluakna… sia narangngi duka tu napokadanna Bendurana kumua lamale na daka’ tu deata unampui beluak iato….

Unnonimi dassi nakua,

“Kukita aku tau ma’beluak… maballo rupanna… maega garaganna iyamo Landorundun ti ungka’ sanganna… daori ulunna salu… tibussanna uai lolong… ma’misanna bura uai… “

Iatonna rangngi Bendurana… na alami tu lembang (perahu/kapal) sundun ballona… dioki’ maya-maya… lembang sura’ (mungkin ini yg menjadi inspirasi lagu lembang sura’).

Malemi unturu’ dassi deata unnula’ salu Sa’dan.

Iatonna lambi’mo ikko’ tandung sepangmi Bendurana male rundun salu Sa’dan tarru’ langngan disanga Minanga… ulunna salu Sa’dan….

Na tiro dassi deata kumua pusamo lembangna Bendurana nakuami ma’kada,

“Tekkek…. pusamo… pusamo, daori ulunna salu… tibussanna uai lolong… ma’misanna bura uai… suleko… suleko… “

La naputa’mi tu lembangna Bendurana apa tae’ na bisa… sorong boko’ tarru’mi domai Minanga sae rokko disanga Malangngo’…

Naparukui unputa’ kappala’na na tikadang lako to’ batu… (konon kapal ini jadi batu dan sampai sekarang masih ada di Malangngo’, Rantepao, Toraja Utara).

Turunmi domai lembangna tu Bendurana na male unrundun salu sae langngan tondok disanga Riu…

Iatonna sitammu mo Landorundun inde Bendurana natiromi tu rupanna sundun maballona… apa nakuami Landorunn ma’kada,

“Apamo naposaba’ inde datu… rampo inde tondokki… den raka pa’peindanmi la rampo mi tungka…”

Napebali Bendurana,

“Tae’ra pa’peindanku la kutungka… sangngadinna inde sarassak bulawan na lulun beluak lando ku rupang lan tasikna Bone… lasae ku tiro inda ma’ apa…”

Nakuami Landorundun,

“Sarassakku… sarassakku… pessusu’ balloku tu mangka ta’de… male n bawa uai…”

Nakuami Bendurana, “totemo laku pobaineko…”

Nakuami ade’na Landorundun,

“Da’ ammu mentireke’ lako kaleku… tang nabenganpa’ indo’ ambe’ku sia rapu tallangku…”

Iatonna rangngimi Bendurana, ma’dosso-dossomi penawanna. Apa tae’ na sorong boko’, malemi Bendurana untanan pao lako to’turunan biasa nani Landorundun male mendio’… iate pao nabawa yomai Bone

Iatonna membuamo inde pao, kendekmi Bendurana langngan Sesean na pematai domai tu pao na. Iatonna tiroi Landorundun tu pao, na alami nakandei tu pao… belanna tae’ natandai kumua paona Bendurana…

Saemi Bendurana na ma’kada kumua,

“Minda ungkade paoku… bua kasa’yanganku…”

Nakua Landorundun pebali,

“aku ungkandei inde pao… tangku kapang Bendurana kumua paomu… tu bua rakka’mu”

Nakua Bendurana,

“totemo lakupobaineko”

Tae’mo nabisa Landorundun un pasulei tu palakunna Bendurana saba’ mangkamo nakande tu paona… kaindananmo lako Bendurana. Napepasanmi Bendurana lako taunna jo Bone nasae umpasibali sola duai. Mangka to nasolanmi male tu Landorundun lako Bone.

Apa iate indo’na Landorundun (Lambe’ Susu’) inang tang masorokpa penawanna unrampananni male tu anakna. Undimi pematai tu anakna tonna malemo nasolan Bendurana. Iatonna mane male rokko sola duai, na undi tu Lambe’ Susu’ jo boko’na unturu’i, liu-liu tongan tu bara’ sia silalle lalle tu kila’ ta’pa. Iatu inan nani to nasangai “ta’pan kila” (menjadi nama kampung sampai sekarang).

Malepa rokko unnula’i saba’ tang masorok liu penawanna te Lambe’ Susu’. Kendekmi langngan batu na mentiro rokko un pematai.

Nakuami , “uh… malemo kasa’yanganku… anak sundun kukamali’… male nasolan Bendurana… lako tondok to Bone…”

Iatu inan nani mentiro rokko nasangai “tiroan” (menjadi nama kampung sampai sekarang).

Tarru’pa rokko tu Lambe’ Susu’, nakendek mensake langngan batu ma’rupa tedong. Iatu inan ya to nasangai “pong sake” (jadi mana kampung sampai sekarang).

Iatonna male pa rokko to randukmo mabongi. Tang natiro tiromo tu Landorundun sola Bendurana male. Iatu inan iato nani nasangai “mata mabongi” belanna lamoraipa untiroi pa tangmaseromo natiro saba’ bongimo. (menjadi nama kampung mata bongi sampai sekarang).

Apa inang tae’, undipa na turu’ sola duai. Belanna tae’ mo natiroi tu lalan inde Lambe’ Susu’, menlesemi na lammak tu lette’na. Iatu inan iato nasangai mi “menlammak” (jadi nama kampung sampai sekarang).

Tumangi’ mi Lambe’ Susu’ belanna male tarru’mo nasolan Bendurana tu anakna lako Bone.

NB: Menurut cerita, Landorundun dimakamkan di daerah Daya, Makassar. Makam dan sumurnya masih ada di Daya, Makassar hingga sekarang. Sumurnya ada didalam lokasi asrama tentara (raider) di Daya, Makassar.

Citation with minor revision. (cited from fb group  : Sejarah adat & budaya Toraja, writen by Yusuf Tampang )

Related post :   Badong : Kadong Bating Pa'pakilala

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!