Menu Tutup

Ancestor story : Tarian pempitu do langi’

“Tarian Pempitu Do Langi’ “

Bendanmi tarian pempitu lan tangngana langi’ tunannangmi pandan dipamaroson lan una’na to paonganan

Siukkunan, ditalo Datu Bakka’ sola Pong Malaleong, tang nasanga duka sipakoko, ditalo Datu Bakka’ sola Pong Malaleong, tang nasanga.

Dipato’do uai, ditalo, tang nasanga, dipadioan bamba masingki’, tang nasanga.

Silondongan, ditalo, tang nasanga, randukmi dipa’paran tekken to ditanan guling

Bendanmi tutungan dama’ tunannangmi tendan ma’lana-lana.        

Buntu sitarru’mi sulle to gandang gulingmi Tarasu i Langi’

Siparakusammi allo melambi’ lan kapararian

Dialami lan allo melambi’ tinaunna Datu Bakka’ sola Pong Malaleong, dirintakmi lan kulla’ kamammuran.

Naballakmi Tarasu i Langi’ sanda salunna nasareseimi ta’pa malesona

Lumbangmi pole lan ta’ka’ Datu Bakka’ sola Pong Malaleong dipotedong-tedong uma, dipokarambau tempe’

Narandan omi saki unnangga’ Bannobulaan lan tangngana langi’, rammun ma’posanga-sanga Datu Baine lan massuanggana to paonganan.

Umbaliangan omi batu ba’tangna Puang Matua, umbibi’ karangan inaanna To Kaubanan lan una’na to palullungan

Dilandolalannimi Indo’ Belo Tumbang rekke ulunna langi’ dilangka mambelami Indo’ Bunga Sampa’ rekke karopokna pandan matari’ allo

                Pa ia sikambi’ pedampi tiang, ia siingko’ petamba’ to lakaan

Umpatiangka’mi bate lentekna Indo’ Belo Tumbang, sibaa pedampi ma’burra, umpatirimbami passoenanna Indo’ Bunga Sampa’ sikaloli’ lamba’ ma’pakuli-kuli.

Rampomi lan tangngana langi’ Indo’ Belo tumbang, tidukunmi lan masunggana to paonganan Indo’ Bunga Sampa’

Ma’pangan-panganmi sola Puang matua, Puang Bassi-Bassian, Puang Ambo-Amboan, Sundunmi ma’pangan-pangan, upu’mi ma’damerak-merak, ma’kadami Indo’ Belo Tumbang kumua :

“Indemokan sibaa pedampi ma’burra, apa pusa’ te batu ba’tangki, Puang, kalili karangan inaanki. Sitintikan unnola pangala’ tamman, diongkan la umpolalan to kurra manapa’. Tae’ nalo’bang lalan kipolalan, tae’ namaindan mata kalambanan kipokalambanan”.

Ma’kadami Puang Matua kumua :

“Umba nakita batu ba’tangmu, Indo’ Belo tumbang, tiapa natontongi karanganmu, Indo’ Bunga Sampa’?

Nakua : ”Lando lalanniri Kambuno Langi’, laka pa’taunanni Ta’dung Kaissanan anna kendek disondong inde banua bassi tumangke suru’ ma’rebongan didi, anna langngan dipalanta’ inde a’riri bongga ura’na tumetang lindo sara’ka’ masserekan tuyu rante”.

Randukmi sapean tabang lan banua bassi, tipamulannami rabekan tangke lassigi a’riri bongga ura’na.

Umpale’ke’mi pedampi ma’burra Indo’ Belo Tumbang, umpalakomi tamba’ ma’pakuli-kuli Indo’ Bunga Sampa’.

Kendekmi langngan tampona limbong Bannobulaan, ma’kadoya lussu’, tiangka’mi langngan sapanna minanga Datu Baine ma’manuk dirampanan.

Umpotampami tampa rapa’na, umpokombong kombong sirurunna.

Bendanmi bate manurun, tunannangmi bandera dianginni.

Napondok Puang Matua lan tangngana langi’, napamangka salaga To Kaubanan lan una’na to paonganan

Tang mempue sekke’mi pedampi ma’burra, tang messompo berada’mi tamba’ ma’pakuli-kuli

Torro pareami lan tangngana langi’ unnesung pasaladanmi lan una’na to paonganan.

Urria mellolo tau, ussaladan to sanda rangka’na

Urria ma’bala tedong, ussarande kaeran ma’pangkung karambau.

Urria pare tallu bulinna, ussaladan ke’te’ tallu etengna.

Urria tanan sanda rupanna lan tangngana langi’, ussaladan barang apa mintu’ solanasang.

Umpataka’ omi pa’batangan Puang Matua, umpasolo’ omi pa’inaan To kaubanan sola Arrang Dibatu.

Umballa’mi tangdo’ kalua’ dao banua bassi, unggaragaimi inan masea-sea dao a’riri bangga ura’na.

                Umpakendekmi to disalampe manikki.

Dilando lalannimi burake manakka, dilaka pa’taunanmi bingsu mapato.

Dilando lalannimi to pedudung tanduk, ditungka mambelami to parende salangka’.

Dipalangnganmi to dibobong bulaanni, simbolong manik, lokkon loerara’

Narundunan bulomi burake manakka dao lisu alukna baine to tumbang, napasitete malaa’mi bingsu mapato  dao tangngana tangngana sondong sangka’ belong-belonganna to unnisung to malangi’.

Ullambemi ianan sanda rupanna to menani, untambaimi barang apa mintu’ sola nasang to pedudung tanduk.

Dilando lalannimi mintu’ lanapopake tananan bua’ dilaka pa’taunannimi mintu’ rongka-rongkana randukan balinono.

Diranteimi rante dibunna’ dilappa’imi padang ditallu rarai

Bedanmi gorang bulaanna, tunannangmi patangdo bulaan.

Sumomba’mi to tumbang tama rante dibunna’ situang pake, situru’ to kayanganmi to dibobong bulaanmi tama padang ditallu rarai sitonda parea.

Bendanmi lumbaa langi’, tunannangmi parangka dialuk.

Randuk omi Kambuno Langi’ bendan ma’tali maa’, petoe songkang, sikangkan doke diremak.

Umpasirundunan bulo nene’ mendeatanna titanan tallu, nene’na manuk, nene’na bai, nene’na tedong.

Tipamulannaomi Ta’dung Kaissanan tunannang ma’tompu masura’, pedekan panaaran, sikangkan induk disila bannang.

                Umpasitete malaa’ to dolo kapuanganna, samba’ batu lalikan.

Sundunmi rekke lolokna alukna kala’paran lan tangngana langi’ upu’mi langngan pedaunanna sangka’ belong-belonganna tananan bua’ lan masuanggana to paonganan.

Torro pariami lan tangngana langi’, pasarande kaeranmi lan una’na to paonganan

Urriami mellolo tallu, ussaladanmi sibidang tauninna.

Tia’dan omi ade’ burana Tandung Siulu, tang ponno suka’namo lupa’na pananda uai.

Umbalianganomi batu ba’tengna Puang Matua umbibi’omi karangan inaanna To Kaubanan.

Bendanmi ade’ raukan tedong lan tampona Tandung Siulu, tunannangmi ade’ tokonan karambau lan tompokna Minanga to Palullungan.

Reference : Bibliography 058

Related post :   Londe Pa'pakilala

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!