Menu Tutup

Aluk Tipondok Dao Tangngana Langi’

Datu Laukku’ nene’na torro tolino, naluang rampanan kapa’ tama to’bena’ kumpang, nabalayan passulean allo, tama tokulo’-kulo’ narampanni kapa’ Bongga Langi’na napakulea’i passulean allo datu muane.

Turu-turu mamma’mi lan rampanan kapa’, lenga’ penamilemi lan passulean allo; dadimi buanna rampanan kapa’, sangbua bannang, tokkomi ta’binna passulean allo sangkayu loli disanga Menturini butung sidulu sanga nene’ mendeatanna tedong, sangtanda’ sitinti pa’gantiananna todolo kapuanganna karambau massonggo bisara.

Rumampanmi kapa’ Menturini tama to’batu tongkon umpakulea’i passulean allo datu muane tama to’tabang tuo, sirampanan kapa’ tumba’ Sulo Tabang sipakulearan passulean allo datu baine.

Turu tedongmi lan rampanan kapa’, lenga’ penamilemi lan passulean allo, dadimi buanna rampanan kapa’, tokkomi ta’binna passulean allo disanga Tumba’ Bena’ Kumpang diganti datu baine, narampanni kapa’ To Tana Rangga napakulea’i passulean allo datu muane, dadimi buanna rampanan kapa’ titanan tallu tokkomi ta’binna passulean allo samba’ batu lalikan disanga :

  1. Kundai Langi’
  2. Kundai Tetuk
  3. Kundai Bubun

Umpatuka’omi pa’ba’tenganna To Tana Rangga, umpasolo’ pa’inaan datu muane, belanna barung-barung maa’pa ade’ lan tangngana langi’ tae’pa bangunan banua, garuga doti langi’pa ade’ lan masuanggana to palullungan tang denganpa ade’ a’riri sanda pati’na.

Malemi To Tana Rangga ullelleng kayu pitu tangkena rekke ulunna langi’, unnuaseimi kayu pitu daunna daya karopokna pandan matari’ allo, apa songka ade’ kayu pitu tangkena tibongso’ rokko liku mandalan, pusa’i batu ba’tangna To Tana Rangga kalilimi karangan inawanna datu muane.

Sulemi daya mai ulunna langi’ mekutana londong lako Puang Matua nakua, “mangkamo’ ullelleng kayu pitu langbana daya kerupukna pendan matari’ allo apa tiranduk rokko to’ matanna uai”

Mebalimi Puang Matua nakua, “Apara tangla tibongso’ rokko liku mandalan ke tae’ nariai tangkean suru’ “

Nakuami To Tana Rangga, “Umbara tu suru’ lakuposuru’?”

Nakuami Puang Matua, “Su’pikmi ampona Pong Maro ammu pasiindo’i likaran biang daa ulunna langi’, diong garonto’na kayu”. Napogau’mi.

Lindangmi patongkon a’pa diong liku mandalan, unnaangmi lentong ganna’ bilanganna diong to’ mata uai.

Dibaami damai ulunna langi’ diranteimi buntu karua, dilappa’imi tanete ganna’ bilanganna. Dipabendannimi patongkon a’pa’, dipatunannangmi lentong ganna’ bilanganna.

Kasalong-salongmi To Tana Rangga tama rampe matallo, tipandayu-dayumi datu muane tama kabu’tuan kulla’, narangngimi panglaa tedong tu nene’ mendeatanna bai unnoni bamban lanmai batu laulung natanding talingami pangkambi’ karambau tu todolo kapuanganna bonde massongge bisara, mangingi’ puyo langi’ lanmai kumila’ kalle-kallean. Randukmi napa’petiroan lako To Tana Rangga tipamulami napa’pedulluan lako datu muane.

Natiromi To Tana Rangga tollong tonganmo kasube rara’na lammi batu laulung, natontongi rupa datu muane tiumba’mo kanuku bulaanna lanmai kumila’ kalle-kallean. Napariaimi tangkean suru’.

To Tana Rangga, napasaladannimi tetangan lindo sara’ka’ datu muane, tibua’tengkomi ade’ nene’ mendeatanna bai ma’bulu aluk lanmai batu laulung, tangsu batakanmi todolo kapuanganna lanmai kumila’ kalle-kellean.

Digaragami pangkung malona’ do patongkon a’pa’ dirandukmi bangke sea-sea do lentong ganna’ bilanganna masirri mana’pami lan pangkung kalua’na umbia’ ra’tuk, makamban marapuanmi lan bangke sea-sea lo’dok kano-kano.

Randukmi Puang Matua umpatuka’ pa’ba’tangan lan tangngana langi’, tipamulami To Kaubanan umpasolo’ pa’inaan lan massuanggana To Palullungna belanna la unggaragamo banua bassi lan tangngana langi’, la umbendanmo a’riri bongga ura’na do massuanggana To Palullungan.

Umpatiangka’mi bate lentekna ullando lalanmi bulaan matasak diong kalambunan allo, umpatirimbami kambutu’ maringnganna ullangka pa’taunanni nane’ tang karauan diong kabotoan kulla’, lanatampa torro tolino, la nakombong  mentau mata.

Dadimi anakna sauan sibarrung titanan annan, kombongmi bongsunna pada dua ganna’ bilanganna disanga :

  1. Pande Patanga’
  2. Pande Paliau
  3. Pande Paita
  4. Pande Manarang
  5. Pande Nunu
  6. Kambuno Langi’

Iamo napatudu lalan Puang Matua unggaraga banua bassi, iamo napatete’ mata kalambanan To Kaubanan a’riri sanda pati’na.

Tonna bendanmo tu banua bassi, tonna tunannangmo a’riri sanda pati’na umpatuka’ omi pa’ba’tengan tu Puang Matua umpasolo’mi pa’inaan To Kaubanan, urranteimi buntu karua, lan tangngana langi’, dirampa’imi minanga To Palullungan, digaragami uma disanga Tandung Siulunna Langi’, namane digaraga tu tengko bulaan Tandung Siulunna Langi’.

Mangkami tu Tandung Siulunna Langi ditampomi tu minanga To Palullungan. Ditengko bulaanmi, diaoka rau-raumi.

Menuaka’mi nene’na sendana sugi’ tama Tandung Siulunna Langi’, memparompongmi todolo kapuanganna kayu mentangke ianan tama minanga To Palullungan. Ussanggangmi ade’ tengko bulaan tu uaka’ barinni’na to sendana sugi’, urru’pukmi ade’ batakan rau-rau balimbing kalua’na kayu mentangke ianan. Diangka’mi langngan kalandona buntu nene’ mendeatanna to sendana sugi’, disakkangmi langngan layukna tanete todolo kapuanganna te kayu mentangke ianan.

Ma’kadami kumua, “Pasulekan rokko tampona limbong, apa tang me’dukkan indete kalandona buntu, patibalikkan rokko uma ma’kambuno lumu’, apa tang lobo’kan indete layukan tanete, angki poli’mora uaka’ barinni’ki umpokaa’ maririnna litak, angki kalili’ mora balimbing kalua’ki, umpokaa’ maririnna litak anna rundu’i kalimbuang boba la susu mammi’na uma ma’kambuno lumu’, napanglola baanmi to’mata uai tu balimbing kalua’ki lan balubu tang sore-sorean panompok doke-dokean”

Diambo’mi ade’ nene’ mendeatanna pare tallu bulinna, disoeranmi todolo kapuanganna ke’te’ tallu etengna. Ditananmi lan Tandung Siulunna Langi’, diosokmi todolo kapuanganna lan minanga To Palullungan.

Apa kendek ade’ pare tallu bulinna langngan ade’ ke’te’ tallu etengna, tang ponno suka’nami burana Tandung Siulunna Langi’, tang lempan kararonami alanna minanga To Palullungan.

Ma’inaa-inaa omi ade’ Puang Matua, ma’ba’teng-ba’teng omi To Kaubanan, dibolloan barra’ omi bulaan matasak tama sauan sibarrung, diboke amboran omi nane’ tang karauan tama suling pada dua, dadimi anakna sauan sibarrung sangayoka tedong, tokkomi bongsunna suling pada dua sangrambana karambau, disanga Datu Mengkamma’ anna misa’ disanga Karaeng Ma’loko-loko, iamo pole’ ungkambi’ pemali sanda saratu’ Tandung Siulunna Langi’, ungkangkana aluk pendua riu minanga To Palullungan.

Iamo nene’ to indo’ to.

Rumampanmi kapa’ Kambuno Langi’, lako Kundai Langi’ umpakulea’i passulean allo datu muane; rumampanmi kapa’ Pande lako Kundai Tetuk; rumampanmi kapa’ Pande Patanga’ lako Kundai Bubun; rumampanmi kapa’ Pande Nunu rekke padang di Illan sirampanan kapa’ Tumba’ Ballan to ponto litakan tao gallang karauan. Dadimi buanna rampanan kapa’ sangayoka tedong, takkomi ta’binna passulean allo sangsamban karambau disanga Datu Bakka’ na misa’ disanga Pong Malaleong.

Randukmi la urrampanni kapa’ lako sangserekanna, noka’mi sangserekanna narampanni kapa’ mengkailingmi sangpa’duananna nakulea’i passulean allo. Ma’kadami kumua, “Tumbai anna noka’  tu sangserekanku kurampanni kapa’, tiapai anna mengkailing tu sangpa’duanangku kupakulea’i passulean allo anna sangtibussanan nene’ todoloku lanmai sauan sibarrung”

Ma’kadami Simbolong Manik kumua, “Tonganna ia nasangtibussanan tu nene’ todolota lanmai sauan sibarrung, apa ma’lalan ba’teng iko tu nene’ todolomu rampo tama padang di Illan, urrampanni kapa’ to ponto litakan”.

Reference : Bibliography 058

Related post :   Karume

Tinggalkan Balasan

Alamat email Anda tidak akan dipublikasikan. Ruas yang wajib ditandai *

error: Content is protected !!